पहिरोमा पुरिएर मृत्यु भएका सातै जनाको सनाखत

२५ साउन, बाजुरा । बाजुराको बारबिसे गाविस-५ जुवापानीमा गएको पहिरोमा पुरिएर मंगलबार विहान सात जनाको मृत्यु भएको छ । पहिरोमा पुरिएर महामती चदरा, भागी चदरा, रोशन चदरा, लक्ष्मी चदरा, राजु चदरा, सरीता चदरा र शंकर चदराको मृत्यु भएको हो । महामतीकी सासु सेतु चदारालाई भने घाइते अवस्थामा उद्धार गरिएको छ ।

विहान चार बजे गएको पहिरोले स्थानीय गोरे चदराको घरमा सुतिरहेका उनीहरुलाई पुरेको हो । बाजुराका टाँची र मौरी प्रहरी चौकीका प्रहरी र स्थानीयबासीले विहान दस बजे मात्र घटनास्थलबाट शव बाहिर निकालेका थिए ।

घटनास्थल सदरमुकाम मार्तडीबाट एक दिनको पैदल दूरीमा पर्दछ ।

सर्पले डस्दा एकै घरका ३ जनाको मृत्यु

यसैबीच बाँकेको इन्द्रपुर गाउँ बिकास समिति ६ मा सर्पको डसाइबाट मंगलबार विहान एकै घरका तीन जनाको मृत्यु भएको छ । मृत्यु हुनेहरुमा इन्द्रपुरका दुखीराम खटिकका १२ वर्षीय छोरा राकेश, ९ वर्षीया छोरी उषा र ७ वर्षीया छोरी मनिषा छन् ।

विहान चार बजे सर्पको डसाइबाट बिरामी भएका उनीहरुको भेरी अञ्चल अस्पतालमा उपचारको क्रममा मृत्यु भएको अस्पतालले जनाएको छ । एकै परिवारका तीन सदस्यको मृत्यु भएपछि खटिक परिवार शोकमा डुबेको छ ।

ट्याक्टर दुर्घटनामा सहचालकको मृत्यु

यसैबीच म्याग्दीको कुहु गाविस चिसापानीमा मंगलबार विहान ट्याक्टर दुर्घटना हुँदा एक जनाको मृत्यु भएको छ । ग १ त १२९८ नम्बरको ट्याक्टर दुर्घटना हुँदा सहचालक कृष्ण किसानको मृत्यु भएको हो ।

दुर्घटना पछि फरार भएका ट्याक्टर चालकको खोजी भइरहेको प्रहरीले जानकारी दिएको छ । (onlinekhabar)