एक सय पटक पराजित भए पनि माओवादीले उम्मेदवारी फिर्ता नलिने

काठमाडौं, साउन २५- माओवादीका प्रवक्ता दीनानाथ शर्माले आफ्नो पार्टी सहमतिका लागि हदैसम्म लचिलो रहेको बताउँदै संविधानमा बहुमतीय प्रणालीलाई संशोधन गरी सहमतीय प्रणाली राखेमा सहमतिको सरकार निर्माणमा सहयोग गर्ने बताएका छन्। एक प्रश्नको जवाफमा प्रवक्ता शर्माले भने, 'बहुमतीय प्रणालीमा एकसय पटकसम्म पराजय भए पनि आफ्नो पार्टीले उम्मेदवारी फिर्ता लिँदैन ।'

बुधबार हुने पार्टी केन्द्रीय समितिको बैठकले प्रधानमन्त्री उम्मेदवारी सम्बन्धमा पार्टीले ठोस धारणा ल्याउने उनले जानकारी दिए।

संविधान निर्माण, शान्तिप्रक्रियामा गहन छलफल गरी सबै दललाई मान्य हुने सहमति नभएसम्म सहमतिमा नजाने विभिन्न दलका नेताले बताएका छन् ।

मंगलबार राजधानीमा आयोजित साक्षात्कार कार्यक्रममा प्रमुख तीन दलका नेताले बिनासहमति प्रधानमन्त्रीको उम्मेदवारी फिर्ता नहुने बताए। काङ्ग्रेस नेता डा. प्रकाशशरण महतले संविधान निर्माण, सेना समायोजन, कब्जा सम्पत्ति फिर्ता, वाईसीएलको अर्धसैनिक संरचनाका सवाल बहसमा ल्याई सर्वसम्मत स्वीकार्य भएमा उम्मेदवारी फिर्ता हुनसक्ने अन्यथा नहुने बताए ।

नेता महतले मधेसवादी दलले नेपाली कांग्रेसलाई समर्थन दिने भएकाले माओवादीलाई पनि आफ्नो दललाई समर्थन गर्न अनुरोध गरे ।

एमालेका सचिव युवराज ज्ञवालीले दलहरूले सरकार निर्माणमा बढी ध्यान केन्द्रित गरेकाले शान्ति प्रक्रिया र संविधान निर्माण कार्य ओझेलमा परेको छ भन्दै बहुमतीय दुईवटा सरकार असफल भएको अवस्थामा सहमतीय सरकार हुनुपर्नेमा जोड दिए । नेता ज्ञवालीले पाँचौं पटक पनि पराजय नभोग्न दुवै दललाई आग्रह गर्दै उम्मेदवारी फिर्ता लिई सहमतिमा आउन सुझाव दिए । (nagariknews)