सहमतीय सरकारका लागि एमालेले लाखौं सडकमा उतार्ने

काठमाडौँ, साउन २३ (नागरिक)- एमाले अध्यक्ष झलनाथ खनालले राष्ट्रिय सहमतिको सरकार गठनका लागि आवश्यक परे लाखौँ जनता सडकमा उतार्ने बताएका छन्। 'राष्ट्रको अग्रगति, शान्ति पुनबहाली र संविधान निर्माणका लागि सहमतीय सरकार बनाउन आवश्यक भए लाखौँ जनता सडकमा उतार्छौ,' खनालले भने।

पार्टी सम्पर्क विशेष समन्वय कमिटीले जिल्ला सम्पर्क मञ्चहरूका लागि आयोजना गरेको केन्द्रीय प्रशिक्षणमा उनले यो कुरा बताएका हुन्। शान्ति र संविधानको मुख्य एजेन्डा माओवादी या कांग्रेस नेतृत्वको सरकारले पूरा गर्न नसक्ने उनले बताए। शान्ति र संविधानको अभिभारा पूरा गर्ने मिसनसहितको सहमतीय सरकार बनाउन सबैले त्याग गर्नुपर्ने खनालको भनाइ थियो।

चारपटक भएको प्रधानमन्त्रीको चुनावमा दुवै दलले बहुमत ल्याउन नसकेको बताउँदै खनालले भने, 'यही स्थितिमा जसको नेतृत्वमा सरकार बने पनि शान्ति र संविधानको गहन कार्यभार पूरा हुन सक्दैन, थपिएको दस महिना समयमात्र बर्वाद गर्छ।'

पाँचौँ चरण मतदानअघि नै दलहरु सहमतिमा पुग्नुपर्ने उनले बताए।

प्रधानमन्त्री निर्वाचनको पाँचौँपटक भदौ २ गते मतदान हुँदैछ। 'यो १० दिनमा राष्ट्रलाई कसरी अगाडि बढाउने भन्ने बहस र छलफल गरी राष्ट्रिय सहमतिको प्रयत्न गर्नुपर्छ,' खनालले भने। प्रधानमन्त्री पदका लागि स्पष्ट बहुमत पुग्दा पनि एमाले सत्ता र कुर्सीको मोहमा नफसेको उनको भनाइ थियो।

आफ्नै पार्टीभित्रै वैचारिक चुनौती रहेको स्विकार्दै खनालले आठौं महाधिवेशनको कार्यदिशा, नीति र सिद्वान्तअनुसार अघि बढ्न सबै नेता र कार्यकर्तालाई आग्रह गरे।