रामजान आजदेखि सुरु

२७ साउन, काठमाडौं । इस्लाम धर्मावलम्वीको पबित्र महिना रमजान विहीबारदेखि सुरु भएको छ । एक महिनासम्म चल्ने रमजानमा विश्वभरका मुस्लिम उपवास बस्नुपर्छ, जसलाई रोजा भनिन्छ ।
नेपाली मुस्लीम समुदायले पनि आज रातिदेखि रोजा बस्न सुरु गर्दछन् । इस्लामको धर्मग्रन्थ कुरआनमा प्रत्येक बालिग मुस्लीमलाई रोजा अनिवार्य छ । तर, बालबालिका, अशक्त र रोगी व्यक्तिलाई बाध्य पारिएको छैन । रोजा बस्ने व्यक्तिका लागि सूर्योदय हुनुभन्दा अघिदेखि सूर्यास्त नहुन्जेलसम्म कुनै पनि खानेकुरा खान, यौनसम्पर्क गर्न र कुनै पनि कुकर्म गर्नबाट रोक लगाइएको छ । रोजा बसेको बेला अर्काको कुरा काट्ने, झटो बोल्ने, झगडा गर्ने, फजुल कुराकानी, अनावश्यक चीज सुन्ने र वर्जित गरिएका कुरा गरेमा रोजा समाप्त हुन्छ ।

रमजानमा मुस्लिमले गरिब र असहायलाई जकात (दान) दिने गर्छन् । रमजानको महिनामा दिनमा पाँच पटक नमाजका अलावा बेलुकी ‘तरावीह’ नाम दिइएको २० रिक्आ नमाज पढिन्छ । यो नमाज मस्जिदमा जम्मा भएर सामूहिक रुपमा पढ्ने चलन छ । रमजानमा एक व्यक्तिले कमाएको पुण्य ५० व्यक्तिले पाएको पुण्य बराबर हुने विश्वास छ ।

रमजानको अवसरमा नेपालस्थित बेलायती दुतावास, मुस्लिम नागरिक समाज, गोरखा-काठमाडौं सम्पर्क मन्च लगायतले विज्ञप्ति जारी निकालेर शुभकामना दिएका छन् । (onlinekhabar)