फिरौती माग्ने ३ पक्राउ

रमेश खतिवडा, चरिकोट, वैशाख १३ - बालक बेपत्ता पारी परिवार सगँ फिरौती माग्ने ३ जनालाई दोलखा प्रहरीले पक्राउ गरेको छ।


महोत्तरी घर भई दोलखाको सदरमुकाम चरिकोट स्थित सातदोबाटो चोकमा जुत्ता सिलाउने काम गर्दै आएका जोगीराम महराका १२ बर्षिय छोरा सञ्जयको अपहरण गरी पिरौती माग्ने ३ जनालाई दोलखा प्रहरीले पक्राउ गरेको छ। गत ५ गते देखी अपहरणमा परेका बालकको भने हाल सम्म अवस्था अज्ञात छ।

उनलाई सदरमुकाम चरिकोटमै बसेर काम गर्दै आएका तराईबासीले अपहरण गरी उनको परिवारलाई फिरौती माग गरेका थिए। प्रंहरीले घटनामा संलग्न रहेको अभियोगमा सर्लाही जिल्ला लक्ष्मीपुर गाविस ७ घर भई हाल चरिकोटमा सिलाईको काम गर्दै आएका मुन्ना भनिने जुबेर मन्सुर, भारतको सितामढी घर भई चरिकोटमा कपडा बेच्दै आएका महोम्मद नुर आलम र भारतको सिमान घर भई चरिकोटमा कवाडी समानको ब्यापार गर्दै आएका रामकिशोर रायलाई पक्राउ गरेको छ।

उनीहरुले चरिकोटमा जुत्ता सिलाउने काम गर्दै आएका जोगिरामका छोरा सञ्जयको अपहरण गरी फिरौती माग गरेको प्रहरीले बताएको छ। उनीहरुले सञ्जयलाई फकाएर गत ५ गते नै लामोसाघुँ जिरी सडक हुदै अरनिको राजमार्ग भएर सिन्धुपाल्चोकको बलेफी सम्म बालकलाई पुर्‍याएको प्रहरी अनुसन्धानमा खुल्न आएको छ। यद्धपी बालकको अवस्था भने हाल सम्म अज्ञात छ। बालक जिल्ला बाहिरै हुन सक्ने प्रहरीको अनुमान छ।

यता जिल्ला प्रहरी कार्यालय दोलखाका प्रहरी नायब उपरिक्षक धिरजप्रताप सिंहले बालकको खोजी कार्य भईरहेको जानकारी दिए। उनले घटनामा संल्रग्नहरुलाई अपहरण सम्बन्धी ऐन २०६३ अन्तर्गत कानुनी कार्वाही चलाईने बताए। (नागरिकन्यूज)