हिंसात्मक हुने शंका भए पर्यवेक्षण गर्नुस् : डा. भट्टराई

१४ बैशाख, काठमाडौं । एकीकृत नेकपा माओवादीका उपाध्यक्ष डा. बाबुराम भट्टराईले पार्टीले घोषणा गरेको आन्दोलन हिंसात्मक हुने शंका भए पर्यवेक्षण गर्न नागरिक अगुवाहरुलाई आग्रह गर्नुभएको छ । मंगलबार बिहान आफ्नै निवास शान्तिनगरमा नागरिक अगुवाहरुसँग छलफल गर्दै डा. भट्टराईले आफ्नो आन्दोलन पूर्णतया शान्तिपूर्ण हुने जानकारी दिँदै दिगो शान्ति र संबिधान सुनिश्चित गर्न आन्दोलनमा जानुपरेको स्पष्ट पार्नुभएको थियो ।


अभिनेता राजेश हमाल, मदनकृष्ण श्रेष्ठ, हरिबंश आचार्य, गायीका आनी छोइङ डोल्मा, मानवअधिकारकर्मी सुशील प्याकुरेल लगायतका नागरिक अगुवाले डा. भट्टराईलाई भेटी मुलुक मुठभेडमा जान लागेकोमा चिन्ता जनाएका थिए ।

‘मुलुकलाई द्वन्द्वमा लैजाने हाम्रो चाहना हैन,’ डा. भट्टराईले भन्नुभयो- ‘दीगो शान्तिका लागि नै हामी शान्तिपूर्ण आन्दोलन गर्दैछौं, यदि शंका लाग्छ भने तपाईहरुकै नेतृत्वमा आन्दोलनको पर्यवेक्षण होस् ।’

छलफलपछि संचारकर्मीसँग कुरा गर्दै अभिनेता राजेश हमालले भन्नुभयो, ‘मुलुक द्वन्द्वमा जाने अबस्था आए परिवर्तनसहितको शान्तिपूर्ण यात्राका लागि डा. भट्टराईले नेतृत्व गर्नुपर्छ । हामी उहाँलाई सघाउन तयार छौँ ।’

कलाकारहरुले आन्दोलनलाई शान्तिपूर्ण बनाउन तथा वार्ता र सहमतिलाई पनि प्राथमिकतामा राख्न माओवादी उपाध्यक्ष भट्टराईलाई सुझाव दिएका थिए । (अनलाइनखबर)