सार्कमा भाग लिन प्रधानमन्त्री थिम्पु प्रस्थान

काठमाडौ, वैशाख १४ - सार्क सम्मेलनमा भाग लिन प्रधानमन्त्री माधवकुमार नेपाल मंगलबार बिहान भुटानको राजधानी थिम्पु प्रस्थान गरेका छन् । १६ औं सार्क सम्मेलन बुधबारदेखि थिम्पुमा हुन लागेको हो ।


पत्नी गायत्री, परराष्ट्र मामिला सल्लाहकार राजन भट्टराई,योजना आयोगका सदस्य दिनेशचन्द्र देवकोटा लगायत १३ सदस्यीय टोली सहित प्रधानमन्त्री त्यसतर्फ गएका हुन् । भुटान प्रस्थान गर्नुअघि त्रिभुवन विमानस्थला संचारकर्मीसंग संक्षिप्त कुरा गर्दै प्रधानमन्त्रीले शिखर सम्मेलनमा नेपालले जलवायु परिवर्तन सम्बन्धी मुद्दालाई महत्वका साथ उठाउने बताए । त्यस्तै विगातमा सार्क सदस्य राष्ट्रकाबीच भएका सहमतिको कार्यान्वयनमा जोड दिने उनले उल्लेख गरे । सम्मेलनमा भाग लिई प्रधानमन्त्री आगामी शुक्रबार स्वदेश फर्किनेछन् । यसअघि परराष्ट्रमन्त्री सुजाता कोइराला सहितको टोली भुटान पुगिसकेको छ । भुटानमा पहिलो पटक सार्क सम्मेलन हुन लागेको हो ।

भुटान जानुअघि प्रधानमन्त्रीले त्रिभुवन विमानस्थलको विशिष्ट कक्षमा माल्दिभ्सका राष्ट्रपति मो.नासिदसंग भेटवार्ता गरेका छन् । नासिद नेपाल हुँदै भुटान प्रस्थान गरेका हुन् । भेटमा दुई देशबीचको आपसी सम्बन्धका विषयमा छलफल भएको बताइको छ । कुटनीतिक सम्बन्ध विस्तार गर्ने,माल्दिभ्सले नेपाली दक्ष कामदार लिने आदि विषयमा दुई नेताबीच छलफल भएको प्रधानमन्त्रीका परराष्ट्र सल्लाहकार राजन भट्टराईले बताए । पाकिस्तानका प्रधानमन्त्री सैयद युसुफ राजा गिलानीपनि नेपाल भएरै भुटान गएका छन् । (कान्तिपुर)